جريمة لا تنسى

جريمة لا تنسى
شخصيات المسرحية
الأخت تريز :راهبة تعمل في الكنيسة تحاول خلق إنسان جديد من فادي
فادي : شاب من الحارة فقير وحرامي يسرق من اجل دواء أبيه ولكن بذرة الخير لا تخلو من إنسان
جرجس: شاب متغطرس عصبي يستعمل يده قبل عقله
هيا : فتاة خبيثة تحرك الجميع حسب رأيها ويصغون لها
سامي : شيطاني و مغرور وأفكاره شيطانية
هلا : فتاة طيبة أخلاقها عالية ترفض الغلط متسامحة
لارا : قرارها من قرار الشلة
سمر : مع الشلة دائما

المشهد الأول
يفتح الستار على صوت موسيقى مخيفة
الهيكل وعليه اكأس والصحن المقدسين
شاب مرتبك وخائف يدخل بإتجاه الهيكل وهو يتلفت حوله عندما يصل إلى الهيكل يأخدذ الصحن والكأس ويحاول الهرب مسرعا .
تدخل الأخت تريز يرتبك فادي !! يجاول ان يخبأ الكأس والصحن خلف ظهره ويدور الحوار التالي
الأخت تريز : سلام المسيح يا ابني
فادي مرتبكا : أهلا
الأخت تريز ( تحاول أن تسلم عليه باليد )
فادي يتهرب
الأخت تريز : شو معك ورا ضهرك
فادي : ما في شي ( ويحاول الهرب خارجا )
الأخت تريز: لحظة يا ابني لا تاخد هدول عندي شي أغلى ( تتجه بإتجاه الهيكل )
فادي يقف وينظر اليها ويمشي بإتجاهها بهدوء
الأخت تريز تمسك الإنجيل وتقول : هاد اغلى يا ابني
ينظر اليه فادي ويجد انه ملبس بالذهب يعطبها الكاس والصحن ويأخذ الإنجيل ويركض مسرعا
تدخل هيا فجأة يصطدم بها فادي ويدفعها بيده ويتابع بالخروج مسرعا
هيا : سور تريز شوفي مين هاد
الأخت تريز ما في شي يا بنتي خلينا نروح

المشهد التاني
أعضاء الفرقة يقفون مجموعات
المجموعات( لارا / سمر / جرجس / هلا / )
يدخل هيا وسامي يقفون مع لارا وسمر
تبادلون السلام والتحية
هيا : احزرو مين شفت مبارح هون
سمر: ليش ملبكة مين شفتي هون ؟
سامي : أنا حاسسها ملبكة من وقت الي مشينا أنا وياها
هيا : لأنو عن جد ملبكة !! والي لبكني أنو كان عما يحكي مع سور تريز
لارا : مين خلصينا ؟؟ والله شوقتينا لنعرف هاتي لشوف اكيد منعرفو ؟
هيا : لك هاد الشب الحرامي الي من الحارة بس ما بعرف شو إسمو
سامي : لك ليكون هاد فادي الي ساكن باخر الحارة
هيا: مابعرف شو إسمو بس تيابو مشلخة وشعرو طويل ومنكوش وكان طالع ومعو الإنجيل وراكض وحتى بالعلامة دفشني
سامي ينادي بصوت عالي لجرجس: جرجس جرجس تعا اسماع هالسمعة !!
جرجس : شو في سامي شوبك هات سمعنا ؟
سامي : كان في واحد هون أنتي بتعرفو احزير مين هوي ؟
هلا : كاني سمعتكن عما تقولو فادي ؟؟
جرجس: مين فادي ؟
سامي : هاد الحرامي الي ساكن باخر الحارة
هلا : هاد الشب المسكين ( تقولها بحزن شديد ) اي كتير حلو فايت عالكنيسة
جرجس : مسكين أنتي المسكينة قال مسكين قال . شو كان عما يسوي هون
هيا : ما بعرف بس كان طالع بسرعة وكأنو سارق شي وهربان مشان ما حدا يمسكو
جرجس : والله لو مسكتو لكسرتلو رجلو وحملتو ياها ( يقولها بغضب شديد )
هلا : ليش عم تحكي هيك متل ولاد الشوارع
سمر : هلا أنتي ما بتعرفيه هاد مو مسكين هاد إبن شارع الله يريحنا من هيك أشكال ييييي
لارا : عن جد فادي بقولو عنو حرامي!!! شو جايين الجمعة على الإجتماع يلا منشوفكن

المشهد الثالث
فادي يركع امام الهيكل ويبكي ويصرخ بحزن شديد بيده إنجيل واليد الأخرى على الهيكل ويقول :
قتلتو . حرمتني يا . مجرمة . ماخلتو يعيش بالدنيا ويصرخ
تدخل الأخت تريز ترى فادي تتقدم نحوه تضع يدها على كتفه ينهض مسرعا يرفع يدها عنه ويصرخ في وجهها
فادي : أنتي السبب . أنتي مجرمة أنتي قتلتيه قاتلة مجرمة موتيه
الأخت تريز : قتلت مين ؟ هدي حالك
فادي : لك كيف بدي هدي حالي بعدي عني. بعدي عني . كنت رح بيع الكاس والصحن كانو دهب كانو جابو مصاري كتير كنت جبت دوا فين لأبي بس لما أخدنت هاد الكتاب ما حدا إشتراه بتعرفي ليش ؟ لأنو مو دهب لأنو نحاس ما حدا أخدو أنا ما ضل معي مصاري لأشتري الدوا وكان صرلو أبي يومين بلا دوا ولما رجعت عالبيت لقيتو ... لقيتو ميت . ( ينهار فادي )
الأخت تريز : هدي حالك أبوك ما مات أبوك طلع عالملكوت وبعد اسبوع عيد القيامة أكيد الرب رح ياخدو معو عالسما هيك بقول يسوع بهاد الكتاب . الكتاب الي عطيتك ياه اغلى من كل مصاري الدنيا
(يجلسون تيدأ ترتيلة )
فادي : يقول سور في شي كتير حلو بهالكتاب أنا اسمي فادي سور
الأخت تريز : فادي إسم حلو على اسم يسوع الفادي أنا إسمي سور تريز
فادي : بتعرفي سور أنا ما كنت بعرفوا ليسوع بس هلق بلشت اتعرف عليه
الأخت تريز فادي نحنا عنا فرقة بالكنيسة شباب وصبايا من عمرك وحابين يعملو مسرحية عيد القيامة . شو رأيك تشاركنا ؟
فادي : مابعرف . ما بعرف
( بحيرة شديدة ورضا قليل ) بشوف .
الأخت تريز لأ لازم تشارك تعا الجمعة على الإجتماع ومنحكي

المشهد الرابع
الفرقة مجتمعة ( واحد يرتب مكان الإحتماع . تدخل هلا معها شخص المسيح بيدها تضعه في المنتصف . تدخل الأخت تريز)
الأخت تريز : سلام يسوع يا جماعة
الجميع : مسا الخير سور
الأخت تريز : يمكن صارلازم نحضر شي مشان عيد الفصح
لارا : سور مو قلتي مسرحية ؟
هلا : امبلى سور مسرحية الصلب فينا نمثلا حلو كتير !!
الأخت تريز أنا جاهزة وعندي شخص بمثل دور المسيح
سامي : عن جد سور مين هوي اكيد أنا ههههههههههههههه
سمر : لا يا أنتي كتير عليك دور الشيطان الي سحقو المسيح
( يضحك الجميع . سامي ينظر إلى سمر بحقد )
جرجس: مين هوي سور شوقتينا
الأخت تريز : فادي شب جديد بالكنيسة هوي الي رح يمثل دور المسيح !!
الجميع يسكت يسود الصمت مع تبادل نظرات التعجب والإستغراب
ثم يتهامسون : فادي هاد الحرامي . الحرامي . السراق معقول ؟؟؟
الأخت تريز : لا لا تقولو هيك الشب بلش يتوب ويعرف يسوع
هلا : أنا قلتلن هيك وقلتلن لازم نكون معو لأنو مسكين
سامي : بلش يتوب ؟ بعمرو ما إجا عالكنيسة
هيا : إذا عرف شو شكلا أصلا
لارا : اي ما شفتو بالكنيسة ابدا سور
سمر: ما بيتناول هاد إذا كان عامل أول قربانة
(يدخل فادي . يحاول جرجس النهوض يمنعه البقية و تنهض الأخت تريز تأخذ فادي وتقول )
الأخت تريز : هاد فادي الي حكيتلكن عنو الي رح يمثل دور المسيح والجمعة الجاية المسرحية . ( تخرج مع فادي )

الشباب يجتمعون
جرجس : يعني رح تقبلو بهاد الشي
هيا : لأ ما الازم نقبل
هلا : بس يا جماعة السور قالت بلش يتوب لازم نقبلو
سامي : لازم نقبلو ؟؟؟؟؟؟؟؟ مع تعديل بعض الأحرف يعني بتصير نقتلو !!!!
جرجس : أنتي قلتا نقتلو
سمر: شو يعني نقتلو ؟؟
جرجس: يعني نخلص من حرامي ننضف الحارة والكنيسة من امثالو
لارا : معقول ؟؟؟ أوكي موافقة
هلا : لأ شو عما تحكوا أنا ما فيني شارك هي إسما جريمة أنا منسحبة
سامي : عما نمزح هههههه هلق معقول نقتلو يعني روحي روحي الله معك
(يجمعهم جرجس ويتحدثون بصوت مخفض)

المشهد الخامس
قبل عرض المسرحية بدقائق إجتمع الجميع بدون هلا وفادي
جرجس : شو شباب جاهزين للمسرحية
سامي :هههههههههه أكيد جاهزين قال جاهزين أنا ناطر هاللحظة
لارا: لساتكن مصممين عالي ببالنا؟؟؟
جرجس : ليش خايفة ؟
هيا : إذا خايفة روحي الحقي فادي الحرامي والست هلا
لارا : خايفة انا مابخاف قال خاف من شو بدي خاف؟ أنا معكن
سامي: شو اتفقنا ؟
سمر : اكيد يلا خلونا ننزل نبلش بمسرحيتنا
سامي : ههههههههههههه مع بعض التغيرات بالنص هههههه

المشهد السادس والأخير
يدخل فادي حاملا الصليب من بين الجمهور وخلفه الجميع يجلدوه ويضربوه بلئم شديد
الا هلا لأنها اخذت دور مريم العذراء بالمسرحية تمشي معهم وعيونها مشدودة لفادي وهو يحمل الصليب وبحزن عميق
الوقعة الأولى يقع فادي على الأرض فيشارك بضربه الجميع بلئم وقسوة
الوقعة الثانية يقع على الأرض مرة أخرى يضربوه بلئم اكبر ويبصقون عليه
الوقعة الثالثة تكون اول درج المسرح كذلك الضرب بقوة اكبر من كلا الوقعتين مع الشتم والسب
فادي : أخ عما تضربوني عن جد ؟
جرجس :هههههههههه اسكوت ولا خلونا نجلدو
سامي يشلحه التوب ويبدأ بالجلد
ثم يضعونه على الصليب
تقول هيا: لنصلبه
يقوم جرجس بدق المسامير وتساعده سمر ولارا
هلا تقف باكية تمثل دورها وهي تظن ان زملائها يمثلون المسرحية فقط
بعد دق المسامير يرفعون الصليب
فادي : يا أبتي إغفر لهم لأنهم لا يعلمون ما يعملون ( وهو يتألم بشدة )
سامي: صلبنا ملك اليهود
يركعون امامه ويسخرون منه
فادي : الهي الهي لماذا تركتني . بين يديك استودع روحي( ويموت )

تنتهي المسرحية ينزل الستار مسرحيتهم تنتهي لكن ؟؟؟؟؟
يعود يفتح الستار مرة اخرى هلا راكعة امام الصليب تحاول ان تلمس قدمي فادي
هلا : رفضوك متل ما اليهود رفضو المسيح . قتلوك متل ما قتلو المسيح
على مين بدي أبكي على المسيح الي عما مثل دور أمو ولا على رفيقنا فادي ؟؟؟
تمسك بقدميه وتبكي
يسجد الجميع بعيدا عنه قليلا يسود المكان صمت شديد مخيف
تتجه هلا اليهم تمسكهم واحد واحدا
قتلتوه يا مجرمين قتلتو فادي ما قبلتو حتى انو تاب
يزحف الجميع بإتجاهه وهم يصرخون لأ لأ لأ لأ
يحاولون أن يلمسو قدميه لكنهم لن يصلو ولم يصلو البكاء يعلووموسيقى الندم يغلق الستار تنتهي المسرحية